ಒಂದೇ ಒಂದು ಹನಿ

ನಿನ್ನಾಣೆ ಗೆಳತೀ
ನಿನ್ನ ಸ್ಪರ್ಷದ
ಕರೆಂಟ್ ಬೇಕಾಗಿದೆ…
ಆಣೆ ಭಾಷೆ ಬೇಕಿಲ್ಲ
ಗೆಳೆಯಾ ಕಣ್ಣು
ನೂರಾಸೆ ಹೇಳಿದೆ…
*****

ಹನಿ ಹನಿ..

ಎರಡು ವ್ಯಂಗ್ಯಗಳು

ಎಲ್ಲ ಬಿಟ್ಟು ನಡೆದ
ಸಿದ್ದಾರ್ಥನಿಗೆ
ಮಧ್ಯ ರಾತ್ರಿಯಲ್ಲಿ
ಬೆಳಕು ಕಂಡಿತ್ತು..
ಬೆಳಗಾಗುವಷ್ಟರಲ್ಲಿ
ಮಡದಿ ಯಶೋಧರೆಯ
ಬಾಳು ಕತ್ತಲಾಗಿತ್ತು !!
******

ಬೆಳೆದು ನಿಂತ ಭೀಷ್ಮನ
ಲಾಲಿಸಿದ ಸತ್ಯವತಿ
ಮಹಾತಾಯಿ…
ನಮ್ಮೂರ ಹುಡುಗಿ
ಮದುವೆಯಾದಾತನ
ಚಿಗುರು ಮೀಸೆಯ
ಮಗನೊಡನಿದ್ದರೆ
ಊರ ತುಂಬ
ಗುಸು ಗುಸು..
******

ಕೋರಿಕೆ

ಬೆಳಗು ಇಬ್ಬನಿಯ
ಹನಿಯಂತೆ
ನಿನ್ನ ತುಟಿಯಂಚಿನ
ತುಂಟ ನಗು..
ಹಾಗೇ ಕರಗಿ
ಹೋಗದಿರು ಬದುಕೊಳಗೆ
ನನ್ನೆದೆಯ
ತೆರೆದೊಮ್ಮೆ
ಹಣಕಿ ನೋಡು..

Honey… ಹನಿ..

ಗ್ರಹಣ

ನನಗೆ ಈ ಬಾರಿ
ಆರು ದಿನಗಳ
ಗ್ರಹಣ..
ಮೊನ್ನೆ ಹೋಗುವಾಗ
ನನ್ನ ಚಂದಿರ
ಹೇಳಿದ್ದಾನೆ
ಇನ್ನು ಸಿಗುವುದು
ವಾರದ ನಂತರ…

ಹನಿಗಳ ತುಂತುರು..

ಹೊರಗೆ ಸುರಿವ
ಮಳೆಯ ಧಾರೆ
ಇಳೆಯ
ತಣ್ಣಗಾಗಿಸುತಿದೆ…
ನನ್ನೆದೆಗೆ ಸುರಿವ
ನಿನ್ನೊಲವ ಧಾರೆ
ನನ್ನ
ಬೆಚ್ಚಗಾಗಿಸುತಿದೆ..

******

ರಾತ್ರಿ ರಾಣಿ
ಮೆಲ್ಲ ಮೆಲ್ಲನೆ
ತನ್ನ ಚಾದರ ಹಾಸಿ
ಜಗ ಕತ್ತಲಾಗುವಾಗ
ನಿನ್ನ ನೆನಪು
ನನ್ನ ಮನದಲಿ
ಹಣತೆ ಹಚ್ಚುತ್ತದೆ..

ಗುಟ್ಟು

ನಿನ್ನೆ ನಿನ್ನ ಮಡಿಲಲ್ಲಿ
ತಲೆಯಿಯಿಟ್ಟು
ವಿರಮಿಸಿದಾಗ
ನಾ ಕಳೆದುಕೊಂಡ
ನನ್ನವ್ವ ನೆನಪಾದಳು..

ಹನಿಗಳು

ಎಚ್ಚರಿಕೆ

ನಿನ್ನ ಮನವನ್ನು
ಚಿಂತೆಯ ಅಗ್ನಿಕುಂಡಕ್ಕೆ
ಅಪರ್ಿಸುವಾಗ
ಅದರೊಳಗಿನ ನಾನೂ
ಕರಕಾಗುವೆ
ಎಂಬ ನೆನಪು
ನಿನಗಿರಲಿ..

%%%%%

ಅಕಟಕಟಾ

ಮನಸು ಚುಕ್ಕಿಯಿಟ್ಟಿತು
ಹೃದಯ ಚಿತ್ರ ಬಿಡಿಸಿತು
ಕನಸು ಬಣ್ಣ ತುಂಬಿತು
ವಿಧಿ ಅಳಿಸಿ ಹಾಕಿತು

%%%%%

ಒಂದಷ್ಟು ಹನಿಗಳು

ನಿನ್ನ ತುಟಿ

ಸವಿಯಬೇಕೆನಿಸಿತು

ನಗುವಾಗಿ

ಅಲ್ಲಿ ನೆಲೆಯಾದೆ

*************

ಮೊನ್ನೆ ಸಂಜೆ

ಸಮುದ್ರ ದಂಡೆಯಲಿ

ನೀ ನನಗೆ ಮುತ್ತಿಟ್ಟದ್ದು

ಕಂಡ ಸೂರ್ಯ

ನಾಚಿ ಕೆಂಪಾಗಿ

ಮರೆಯಾಗಿ ಹೋದ

*************

ನನ್ನ ಕನಸುಗಳನ್ನು

ಮೋಡಗಳಾಗಿ

ಬಾನಲ್ಲಿ ತೇಲಿಬಿಟ್ಟೆ

ಅವು ಮಳೆಯಾಗಿ

ನಿನ್ನೆದೆಗೆ ಸುರಿದಾಗ

ಒಲವು ಚಿಗುರೊಡೆಯಿತು

*************

ಎಲೆ ತನ್ನ ರಕ್ತ

ಬಸಿದು ಕೊಟ್ಟಿತ್ತು

ನಾನು ಮದರಂಗಿ

ಎಂದು ಸಂಭ್ರಮಿಸಿದೆ

*************

ನನ್ನನ್ನು ಹೂವಿಗೆ

ಹೋಲಿಸಬೇಡವೋ

ಬಾಡಿದ ಮೇಲೆ

ಬದುಕಿಲ್ಲವಾಗುತ್ತದೆ

*************

ನೀ ನನ್ನ ಬಿಟ್ಟು

ಹೋಗಿದ್ದಕ್ಕೆ ಅಳುತ್ತೇನೆ

ಎಂದುಕೊಂಡೆಯಾ

ಮತ್ತೊಮ್ಮೆ ಸ್ವಾತಂತ್ರ್ಯ

ಸಿಕ್ಕಿದ ಖುಷಿಯನ್ನು

ಆಚರಿಸುತ್ತಿದ್ದೇನೆ

*************